Қарттарға қамқорлық – қоғамның парасаты

Қостанай ауданында қарияларға арналған белсенді ұзақ өмір сүру орталығы бой көтеруде.
Қостанай ауданының әлеуметтік келбетін айшықтайтын ерекше жоба жүзеге асырылып жатыр. Октябрь ауылдық округінде орманмен көмкерілген тыныш, табиғи аумақта белсенді ұзақ өмір сүру орталығы салынуда. Бұл – егде жастағы адамдарға арналған жай ғана мекеме емес, бұл – тынығу, дамып-жетілу, қоғаммен араласу, жан саулығы мен тән саулығын қатар ұштастыратын заманауи кеңістік.

Қамқорлық пен жайлылық қатар

Жобаны қолға алған кәсіпкер Мизанбаев Аман Елеусізұлының айтуынша, орталықтың жалпы құны 300 миллион теңгені құрайды. Жоба толықтай жеке инвестиция есебінен жүзеге асып жатыр. Қарияларға арналған бұл нысан 130 адамға дейін қабылдай алады. Ең басты ерекшелігі – әр адамның жеке қажеттіліктері ескерілген.

Орталықта арнайы жабдықталған бөлмелер бір адамнан төрт адамға дейін лайықталған. Бұл – тұрғындардың таңдау еркіндігін сақтай отырып, оларға жайлылық сыйлау мақсатында ойластырылған шешім. Орталықта қажетті тұрмыстық жабдықтар, демалу мен тынығуға арналған қолайлы жағдайлар қарастырылған.

Орталық табиғат аясында – орман жиегінде орналасқан. Мұндағы таза ауа мен табиғи тыныштық қарттардың денсаулығын қалпына келтіріп, психологиялық жай-күйіне оң әсер етері сөзсіз.
Кешен аумағында бау-бақша шаруашылығы ұйымдастырылады. Қариялар өз еріктерімен бақшада еңбек етіп, тіршілікпен араласып, сергектікке ұмтылатын болады. Сонымен қатар, табиғи бал өндіру де жолға қойылады деп жоспарлануда. Бұл тек пайдалы өнім алу ғана емес, сонымен қатар қариялардың еңбекке араласу арқылы өзін-өзі қажет сезінуіне жағдай жасау болмақ.

Тренингтер мен рухани қолдау

Қарттық – өмірдің кемелденген кезеңі ғана емес, өзінше сын сәт. Осыны ескерген жоба координаторының айтуынша, мұнда қарияларға арналған тренингтік бағдарламалар өткізу жоспарланған. Бұл – қарт жаста кездесетін психологиялық қиындықтардың алдын алып, өмірге деген құлшынысты арттыруға бағытталады.
Қарияларға психолог мамандар тұрақты қызмет көрсетеді. Әсіресе жалғызбасты, әлеуметтік жағынан әлсіз жандар үшін бұл аса маңызды. Олар мұнда бір аптадан бастап бір айға дейін тұрақтап, барлық қажетті психологиялық, әлеуметтік көмекті ала алады.

Мәслихат депутаттары оң бағасын берді

Бұл орталық тек қарттар үшін емес, жергілікті халық үшін де үлкен мүмкіндік. Нысан іске қосылғанда 50-ге жуық адамға тұрақты жұмыс орны ашылады. Бұл – ауыл тұрғындарының әлеуметтік-экономикалық жағдайын жақсартуға қосылатын үлес.

Өткен аптада Қостанай ауданы мәслихатының депутаттары орталықтың құрылысымен танысып, жобаның ерекше әлеуметтік маңыздылығын атап өтті.

– Бұл – тек қарияларға арналған мекеме емес, бұл – қоғамның рухани деңгейін көрсететін жоба. Мұнда тек жайлы жағдай ғана емес, жанға дауа болар тыныштық, табиғаттың тылсым тынысы мен адамгершілік қамқорлық бар, Бұл – заманауи көзқараспен жасалған жоба. Қарияларға деген қамқорлық осындай нақты істер арқылы көрініс табуы тиіс, – деді аудандық мәслихаттың төрағасы Марат Сартов.

Қарияны ардақтаған ел – берекелі ел

Халқымыздың: «Қарты бар үй – қазыналы үй» деген аталы сөзі тегін айтылмаған. Қоғамның парасаттылық деңгейі – оның қарттарға деген көзқарасынан көрінеді. Қостанай ауданында бой көтеріп жатқан бұл орталық – сол көзқарастың жарқын көрінісі.

Бұл тек орталық емес, бұл – өмір мектебі. Мұнда ұрпақтар сабақтастығы жалғасып, үлкеннің өнегесі мен ақылы жастарға үлгі болады. Қариялар – тарихтың көзі, өмірдің шежіресі. Оларға құрмет көрсету – болашаққа жасалған берік инвестиция.

Қостанай ауданындағы белсенді ұзақ өмір сүру орталығы – адамгершілікке, жанашырлыққа, әлеуметтік жауапкершілікке негізделген жобаның үлгісі. Мұндай игі істер көбейсе, еліміздің қарттары бақытты, жастары саналы, қоғамы ізгілікті болары сөзсіз.

Жұмагүл ИРГАСЫМОВА