Сағынышқа айналған сазгер
Полониковка ауылдық кітапханасында қазақ музыкасының классигі, халықтың сүйікті сазгері Шәмші Қалдаяқовтың туғанына 95 жыл толуына орай «Сағынышқа айналған сазгер» атты вечер-элегия ұйымдастырылды.
Бұл рухани-танымдық кештің мақсаты – Шәмші Қалдаяқовтың музыкалық мұрасын кеңінен насихаттап, жас ұрпаққа ұлттық өнер қайраткерлерінің өмір жолы мен шығармашылығы жайлы терең мағлұмат беру. Қазақ ән өнерінің алтын қорына енген әуезді туындылардың авторы туралы тың деректер мен әсерлі әңгімелер қатысушылардың ерекше ықыласына бөленді.
Іс-шара барысында оқушылар композитордың өмірбаянымен және шығармашылық жолымен танысты. Оның жүректен шыққан туындылары – «Қайдасың», «Ақ бантик», «Арыс жағасында», «Сарыжайлау» сынды әндер халық арасында кеңінен таралып, бүгінде де өзектілігін жоғалтпағаны айтылды. Сонымен қатар Шәмші Қалдаяқовтың жазған «Менің Қазақстаным» әні еліміздің мемлекеттік әнұранына айналғаны да шара барысында ерекше атап өтілді.
Кеште Шәмшінің «Қуаныш вальсі», «Бақыт құшағында», «Қайдасың» сияқты танымал әндері орындалып, тыңдаушыларды ерекше әсерге бөледі. Әнмен бірге өмір сүрген сазгердің шығармашылығы туралы «Шәмші Қалдаяқов – Қазақстан халқының дара тұлғасы» атты деректі фильм көрсетіліп, композитордың өнердегі және өмірдегі жолынан сыр шертілді.
Шара аясында ұйымдастырылған тақырыптық кітап көрмесінде оқырмандар назарына сирек фотоматериалдар, мерзімді басылым беттерінде жарық көрген мақалалар мен композиторға арналған естеліктер ұсынылды. Бұл көрме арқылы қатысушылар Шәмші Қалдаяқовтың халқымыздың жүрегінен орын алған мәңгілік мұрасымен жақынырақ танысу мүмкіндігіне ие болды.
Сазгердің әндері қазақ халқының жан дүниесін, сағынышы мен қуанышын әуезді әуенмен жеткізе білді. Сондықтан да Шәмші Қалдаяқов ел есінде «Қазақ вальсінің патшасы» деген құрметті атаумен қалды.
Іс-шараға қатысқан оқырмандар кештен рухани әсер алып, қазақ музыка өнерінің бірегей тұлғасы туралы жаңа мағлұматтармен қаруланды. Халқының жүрегінен орын алған әндер ешқашан ұмытылмақ емес.
Балжан ОМАРОВА,
Половниковка ауылдық
кітапханасының кітапханашысы
Добавить комментарий