Алтын дала ауылдық кітапханасында балаларға еліміздің рәміздерін қастерлеуге

Отанын сүюге, Ата заңымызды құрметтеп, ұлтжандылық пен достыққа тәрбиелеу мақсатында Қазақстан Республикасының Конституциясының қабылданғанына 30 жыл толуына орай «Ата заңым – ардақты!» атты құқықтық сағат өткізілді.

Іс-шара барысында кітапханашы Айткүл Кудесова балаларға Ата заңымыз туралы мағлұмат беріп, тарихи заң үлгілеріне шолу жасады. Ол қазақ халқының құқықтық жүйесі терең тарихтан бастау алатынын, соның ішінде «Қасым ханның қасқа жолы», «Есім ханның ескі жолы» және «Тәуке ханның Жеті жарғысы» – ел басқарудың озық үлгілері болғанын атап өтті.

Шара барысында 1993 жылы 28 қаңтарда қабылданған Қазақстанның тұңғыш Конституциясы және қазіргі қолданыстағы 1995 жылғы Конституция туралы жан-жақты әңгіме өрбіді. Балаларға Ата заңның негізгі баптары, әсіресе балалар құқықтары туралы түсіндіру жұмыстары жүргізілді. Сонымен қатар 1989 жылы қабылданған Бала құқықтары туралы Конвенция, оған Қазақстанның 2002 жылы қосылғаны, сондай-ақ осыған байланысты қабылданған «Қазақстан Республикасындағы баланың құқықтары туралы» заң туралы айтылды.

Шара барысында оқушылар Ата заң туралы өлеңдер оқып, «Құқығыңды білесің бе?» атты танымдық бөлімде сұрақтарға жауап беріп, өз білімдерін ортаға салды. Сонымен бірге «Ата Заң – алтын діңгегім» атты кітап көрмесі ұйымдастырылып, қатысушылар назарына ұсынылды.

Ата Заң – еліміздің негізгі заңы, ол – халықтың құқықтары мен бостандықтарын қорғайтын басты құжат. Ол – ел тұрақтылығы мен әділеттің кепілі. Конституция әр азаматқа теңдік, еркіндік пен бейбіт өмір сүру мүмкіндігін береді. Сондықтан да Ата Заңды құрметтеу – әрбір қазақстандықтың азаматтық парызы.