Құндылыққа негізделген білім беру мен тәрбие

Ұлттық құндылықтар – әр халықтың бай тарихы мен мәдениетінің ажырамас бөлігі. Олар ғасырлар бойы қалыптасып, ұрпақтан ұрпаққа беріледі. Ұлттың рухани байлығы, дәстүрлері мен әдет-ғұрыптары болашақ ұрпақ үшін құнды мұра болып табылады. Осы мақсатта Н.Наушабаев атындағы мектеп-гимназиясында «Құндылыққа негізделген білім беру мен тәрбие» атты облыстық семинар өтті.

Семинарға облысымыздың түрлі мектептерінен келген педагогтар, психологтар, мұғалімдер мен білім саласындағы мамандар қатысып, ұлттық құндылықтарды білім беру саласында қалай тиімді пайдалануға болатынын талқылады.

Семинардың негізгі мақсаттары мен міндеттері – ұлттық құндылықтарды жас ұрпаққа насихаттай отырып, қазақ халқының дәстүрлері мен мәдениетінің мәні, олардың бүгінгі қоғамдағы маңызын дәріптеу.Ұлттық тәрбие мен білімді ұштастыру. Мектеп бағдарламаларында ұлттық мұраны сақтау және дамыту мәселелері қаралды. Қазіргі жастарды ұлттық рухта тәрбиелеудің жолдары. Әсіресе, жас ұрпақтың өз тілін, мәдениетін, салт-дәстүрлерін құрметтеуі, ата-бабаларымыздың мұрасын бойларына сіңіру қажеттілігі жайлы әңгіме болды.

Семинар барысында бірнеше тақырыптар талқыланды. «Ұлттық тәрбие және оның мектептегі орны» тақырыбында педагогтар тәжірибелерімен бөлісті. Мұғалімдер ұлттық құндылықтарды оқушыларға жеткізу үшін әртүрлі әдіс-тәсілдерді, ойындарды және шығармашылық жұмыстарды қолдана отырып, ашық сабақ берді.

Екінші бөлімде Форсайд әдісі арқылы ата-анамен жұмыс көрсетілді. Бұл жерде бірінші «Болашаққа саяхат» үй тапсырмасы ретінде әр отбасыға тапсырма берілген болатын. «Тобыл-2050», «Антарктидаға киіз үй орнату», «Аманқарағай орманын тез қалыпқа келтіру» тапсырмаларын Жасанды интеллект көмегімен қиялдарына ерік беріп, көрсете білді. Қазақтың ұлттық өнері, қолөнер шеберлері мен музыкасы, ұлттық тағамдары, киімдері мен басқа да мәдени мұраларының болашақта әлем мойындайтыны жөнінде көрсетілді. Сонымен қатар, «Қонақты қарсы алу», «қолға су құю», «Табаққа ет салу», «Бата беру» дәстүрлері көрсетілді.
Семинардың үшінші бөлімінде «Жаһандану кезеңіндегі ұлттық құндылықтарды сақтау» туралы пікір алмасты.

Қазіргі таңда жаһандану процесі ұлттық дәстүрлер мен тілдердің жойылып кету қаупін туғызуда. Сондықтан, ұлттық құндылықтарды сақтау, дәріптеу және жаңғырту мәселелері күн тәртібінде тұр.
Қорытындылай келе, семинар өте нәтижелі өтті.

Ұлттық құндылықтарды насихаттау мен оны қазіргі заман талабына сай жаңғырту үшін мұғалімдер мен білім басқармасының бірлескен жұмысы қажет екені айқындалды. Семинардың қатысушылары ұлттың мәдениетіне деген құрметтің артуы, балалардың ұлттық тәрбиесін күшейту мәселелерінде көптеген жаңашыл идеялар мен ұсыныстар айтты.

Біз өз мектебімізде осы семинарда айтылған пікірлер мен ұсыныстарды ескеріп, ұлттық тәрбие мен білімді ұштастыру жолында жұмысты жалғастырамыз. Сонымен қатар, ұлттық құндылықтарды сақтап, дамытудың әрбір қадамын ұрпақ үшін маңыздылығын түсінуге мүмкіндік береді.
Ұлттық рух пен құндылықтарды бойына сіңірген жас ұрпақ – елдің жарқын болашағы!

Сымбат МУТАЛИПОВА, Н.Наушабаев атындағы
мектеп-гимназиясы директорының тәрбие-ісі
жөніндегі орынбасары