Ауылдағы бірлік пен қайырымдылықтың көрінісі

Алтынсарин ауылының мешітінде қайырымдылық шарасы өтті.

Алтынсарин ауылындағы Әлжан мешітінде Ғабдімәліков Есет Сейтқалиұлы имамның бастамасымен және демеушілердің қолдауымен көпбалалы, тұрмысы төмен және мұқтаж отбасыларға арналып кең көлемді қайырымдылық акциясы өткізілді. Бұл игі шара ауыл тұрғындарының бірлігін арттырып қана қоймай, көпшіліктің жүрегіне қуаныш сыйлады.

Акция аясында 35 отбасыға мектепке қажетті кеңсе тауарлары салынған сөмкелер, бір қап ұн және бес литр өсімдік майы табысталды. Сонымен қатар тағы 16 отбасы күнделікті тұрмысқа қажетті азық-түлікпен қамтамасыз етілді. Мұндай қамқорлық ауылдағы көпбалалы және тұрмысы төмен отбасылар үшін үлкен демеу болды.

Шараға ұйытқы болған – ауылымыздың жаңадан тағайындалған имамы Есет қажы. Имам ауыл тұрғындарын қайырымдылық жасауға, ізгі амалдарда бірлесе қимылдауға үндеді.

Атап өту керек, акцияның жүзеге асуына айрықша үлес қосқан демеушілер болды. Соның ішінде ең негізгі қолдауды «UNO» ұн өндіру зауытының директоры Угур Джан мырза, сондай-ақ «Арсенал» ЖШС және ауылдың жомарт азаматтары болды. Олардың арқасында көптеген отбасы қуанышқа бөленді.

Шара барысында ауыл тұрғындары демеушілерге зор ризашылықтарын білдірді.

– Біздің басты мақсатымыз – ауылдастардың бір-біріне деген қамқорлығын арттыру, мұқтаж жандарға қолдау көрсету. Алла қаласа, мұндай қайырымдылық шараларын тұрақты түрде ұйымдастырып тұрамыз. Мешітіміздің есігі баршаға ашық, біз әрдайым көмек беруге дайынбыз, деп атап өтті Есет қажы өз сөзінде.

Бұл шара – ауылымыздағы ауызбіршіліктің, бауырмалдықтың және қайырымдылықтың айқын көрінісі. Ұлтына, дініне қарамастан, барша ауылдастарға тең көзқарас танытып, қолдау көрсету – басты қағидат екені тағы бір мәрте дәлелденді.

Жиын соңында ауыл тұрғындары елдің амандығын, ауылдың берекесін, халықтың ынтымақ-бірлігін тілеп, «Алла разы болсын!» деген игі ниеттерін жеткізді.

Назгүл ТУКАНОВА,
Алтынсарин ауылының
кітапханашысы