Қайырымдылық – адамгершіліктің айнасы

Ауыл кәсіпкерлері «Мектепке жол» акциясына қолдау көрсетті.

Жаңа оқу жылының қарсаңында елімізде дәстүрлі түрде өткізіліп келе жатқан «Мектепке жол» республикалық қайырымдылық акциясы Озерный ауылында да жалғасын тапты. Бұл жолы әлеуметтік жағынан аз қамтылған, көпбалалы және ата-ана қамқорлығынсыз қалған балаларға қолдау көрсетуде ауыл кәсіпкерлері мен мешіт ұжымы белсенділік танытты.

Ауылдың жомарт жүректі азаматтары өз қаражаттары есебінен мектеп сөмкелері, оқу құралдары, киім-кешек сынды қажетті заттар сатып алып, 20-дан астам оқушыны қуантты. Бұл – балалардың жаңа оқу жылын алаңсыз бастап, білімге деген құштарлығын арттыруға бағытталған игі бастама.

«Жақсының жақсылығын айт, нұры тасысын» демекші, осындай жан жадыратар жақсылықты ел ішінде үлгі етіп көрсету – парыз. Акция аясында ауыл мешіті де белсене атсалысып, мешіттің имамы Ақарыс мырза мешіт алқасының мүшелерімен бірлесіп, әлеуметтік қолдауға мұқтаж төрт оқушыға сөмке мен оқу құралдарын табыстады. Осындай қайырымды іске ұйытқы бола білген мешіт ұжымына Озерный негізгі орта мектебінің ұжымы атынан шынайы алғыс айтылды.

Қазіргі қымбатшылық заманда балаға қуаныш сыйлау – әрбір азаматтың адами әрі имани борышы. Бұл жауапкершілікті терең түсінген азаматтардың қамқорлығы көпке үлгі болары сөзсіз. «Жақсылықтарыңыз еселеніп, сауабы мол болсын!» деген ақжарма тілектер де көп айтылды.

Акция аясында ауыл кәсіпкерлері де қалыс қалмады. ЖШС «АБИЛЬ» басшысы Аманов Асқар Абілұлы бес оқушыға қажетті көмек көрсетіп, қайырымдылық керуеніне үлес қосты. Мектеппен тығыз байланыста жұмыс істейтін, қолдауын ешқашан аямайтын, кең жүректі Асқар Абильевичтің бұл ісі – өскелең ұрпаққа үлгі боларлық.

Сонымен қатар, ЖШС басшысы Естаев Алмат Ибрашұлы де мектебіміздің ұжымы шын жүректен алғыс білдіреді. Жанашыр азаматтық қасиетімен ерекшеленетін Алмат Ибрашевич те балалардың болашағына жол ашуға үлкен үлес қосып келеді.

Ауыл тұрғындары мен ата-аналар осындай қамқор жандарға ризашылықтарын білдіріп, олардың әрекеті өскелең ұрпаққа үлкен тәрбие екенін атап өтті. «Еңбектеріңіз табысты болсын, егіндеріңіз мол болып, ел алғысына бөлене беріңіздер!» деген жүрекжарды лебіздер де айтылып жатты.

Иә, қайырымдылық – жүректен жүрекке жететін ізгілік көпірі. «Мектепке жол» акциясы арқылы көптеген бала шаттыққа бөленді. Ал мұндай игі бастамалар жалғасын табарына сенім мол.

Жұмабике НУРСЕИТОВА,
мектеп директоры