Қостанай ауданында мектептегі тамақтану сапасын бақылау күшейтілді

Қостанай ауданы әкімдігі отырысында мектептерде тамақтануды ұйымдастыру мәселесі қарастырылды.

Аудандық білім бөлімі басшысының мәліметіне сүйенсек, 44 мектепте оқитын 10 132 баланың ыстық тамақпен қамтамасыз етілуі ұйымдастырылған. Бұл 100 пайыздық қамтылу. 44  мектептің 7-не тамақ тасымалданады, 1-де буфет түрінде ұйымдастырылған. 2023 жылдан бері 1-4 сынып оқушылары тегін тамақтанады, бүгінгі күні 4076 бала қамтылып отыр. 2024 жылы бюджеттен 530 млн астам қаражат бөлінді (2023 жылы – 178 млн 602 мың теңге).

Орташа есеппен  бір баланы тамақтандыру 650 теңге тұрады, буфетте – 450 теңге. 2023 жылдан бастап елімізде барлық бастауыш сынып балаларын тегін ыстық тамақпен қамту ұйымдастырылған. Сол уақытта біздің ауданда 28 мектепте ғана асхана болды. 16 мектепте асханалардың жұмысы 20 жылдан бері тоқтап тұрған. Асханалардың жұмысын қайта ұйымдастыруға 4,5 млн қаржы бөлініп, Белозерка мектебінде асхана қайта іске қосылды,Рыспай, Балықты, Нечаевка, Молокановка, Кировка, Краснопередовик мектептерінде асханалық үй-жайлар іске қосылды. Осы мектептерге былтыр 10 млн, биыл 13 млн астам қаражат бөлініп, қажетті жабдықтамен қамтамасыз етілді.Бүгінгі күні ашық конкурстың қорытындысы бойынша балаларды тамақтандыру ісімен айналысатын 15 қызмет көрсетуші анықталды.Алия Құсманқызының айтуынша 35 тамақтану орнында рұқсат құжаттары бар, 9-да жоқ. Бүгінгі күні құжаттар рәсімделу үстінде.

Қостанай ауданының әкімі Берік Таңжарықов бұл сұрақтың қатаң бақылауда екенін айтты.

– Балалардың сапалы тамақтануы өте маңызды. Сондықтан барлық өнімдердің сапасын күнделікті тексеріп отыру міндетті. Мектептерде құрылған комиссия құрамында бір ғана ата-ана болуы дұрыс емес, белсенді ата-аналармен  толықтырылуы керек. Олар балалардың тамақтануын өздері қадағалап отырулары қажет. Барлық жерде ашықтық болғаны абзал. Ата-аналар балаларының дұрыс тамақтанып жүргеніне сенімді болуы керек. Қауіпсіздік басты мақсат болуы керек, деді. Сонымен қатар Берік Қуанышұлы 10 қазанда барлық мектептер рұқсат қағаздарын, құжаттарын толық рәсімдеп болуы керек деп тапсырма берді.