Игілкті істер жасай берейік!

Ислам әлемі үшін қасиетті, берекеге толы, он екі айдың сұлтаны саналатын Рамазан айы басталғалы Мәскеу ауылындағы намазханаға келушілер саны арта түсуде. Мешітте алқа мүшелері де сайланған.

Рамазан – жылына бір рет келетін, сауаптар еселеніп жазылатын қасиетті ай. Осы қасиетті айда ауылымыздың тумасы Кузайбин Нұрлан Сергович және Қостанай азаматы Фларитұлы Тимур намазханаға 9 дөңгелек үстел және газ плита қазан ошағымен сыйға тартты. Мешіт – ұлы мәдениеттерге, адамгершілік пен ізгілікке, рухани құндылықтарды қасиеттей білуге тәрбиелейтін қасиетті орын екені бәрімізге мәлім. Мәскеу ауылындағы намазхананың ашылуына ат салысып қол ұшын созған да осы Нұрлан Сергович болатын. -Ең бірінші ауыл халқы аса ұйымшылдықпен осы намазхананы ашты. Сондай-ақ Мәскеу ауылының тұрғыны Азат ағамыздың көп көмегі болды. Осылайша ауылымызда жөндеп – жабдықтаудан өткен намазхана ашылды. Алла үйіне жиналған ауыл тұрғындары Жаратқаннан нығмет тілейді, -дейді Нұрлан Сергович.

Иә, дінге жанашыр азаматтары мен белсенді жастарының қолдауының арқасында ашылған намазхана рамазан айында өз қызметін жасауда. «Рухани тәрбие мен ілім ордасы – мешітімізден келіп Алланың сөзі – Құранды оқып-үйренемін дейтін талапты жандарға әрдайым есігіміз ашық. Жастарымыздың тәлімін ойлап, намазханаға қажетті құрал-жабдықтарды сыйлаған аға-інілерімізге алғысымызды айтамыз!, – деп ағынан жарылады Ақарыс имам.

Рамазан айы – жомарттық танытып, жақсылық жасалатын ай. Мәскеуліктер де биыл қалыптасқан дәстүрден жаңылмады. Қасиетті айдың 6-сы күні намазханада қайырымдылық акциясы өтті. Игі шара барысында көмекке мұқтаж алты отбасыға азық-түлік таратылды.

-Мына сөмкенің ішінде күнделікті тұрмысқа қажетті азық-түліктің бәрі бар. Бүгінгі акцияны ауылымыздың жомарт жандары ұйымдастырды. Азық-түлік құрамына ең қажетті күнделікті тұтынатын (шай, ұн, май, макарон, күріш, көкөніс өнімдері, құрма, ет т.б) өнімдер енгізілді,- дейді Ақарыс Санақ.

Қайырымдылық жасау – сауабы мол, қайырлы іс. Рамазан айының құрметіне орай ұйымдастырылған қайырымдылық марафонында көмек көрсеткен алқа мүшесінің құрамында Азат Бекзат, Ақарыс Санақ, Мейрам Маратұлы, Рамиль Габдулхаевич, Парасат Сезімхан, Абельдин Қанат, Мейрамбек Еламан деген азаматтардың аты бар. «Көп түкірсе – көл» деген, осы бір қасиетті айда жасалған жақсылықтарға қол ұшын созған әрбір азаматтың ісіне Алла берекет беріп, сауаптан жазсын дейміз.

-Қасиетті рамазан айында біз әзірше алты отбасына азық- түлікпен қолдау көрсеттік. Рамазан игі істерді мейлінше көптеп жасайтын ай. Себебі, бұл айда жасалған әрбір игі іс үшін берілер сауап та көл-көсір. Пайғамбарымыз (с.ғ.с.) хадисінде: «Осы айда Аллаға бір ізгі қасиетпен жақындаған жан басқа уақытта парыз орындағандай. Ал, осы айда парыз амалын орындаған адам басқа уақытта жетпіс парыз орындағандай. Мүфтият үшін негізгі бағыт қайырымдылық болып қала береді, – дейді аға буын өкілі Рамиль Габдулхаевич.

Берекесі мол айда оразаның келгенін қуанышпен жеткізіп, насихаттаған, ауызашар дастарханын жайып, мұқтаж отбасыларға көмегін тигізген алқа мүшесінің азаматтарын Қостанай аудандық «Маңдай батыр» мешітi бас имамы Сыздыков Дархан Манарбекұлы алғыс хатпен марапаттады.

Жұмабике НҰРСЕИТОВА,
Озерный негізгі орта мектебінің директоры