Қостанай ауданында медициналық көмектің сапасы мен қолжетімділігін арттыру бағытындағы жұмыстар жалғасуда

Қостанай ауданының әкімі Нұрғалиев Олжас Жомартұлының төрағалығымен өткен аппараттық кеңесте «Қостанай ауданындағы медициналық көмектің жай-күйі туралы» мәселе қаралды.

Баяндаманы Қостанай аудандық ауруханасы бас дәрігерінің міндетін атқарушы Ержанов Нұрлан Асығатұлы жасады.

Бүгінде Қостанай аудандық ауруханасында 691 қызметкер еңбек етеді. Оның ішінде:
-84 дәрігер;
-250 орта буын медицина қызметкері;
-120 кіші медицина қызметкері;
-149 өзге қызметкер.

Ауданда дәрігерлермен қамтамасыз ету көрсеткіші 10 мың тұрғынға шаққанда – 16,6, ал орта буын медицина қызметкерлерімен қамтамасыз етілу деңгейі 49,5-ті құрайды.

Медицина саласын білікті мамандармен толықтыру жұмыстары жүйелі түрде жүргізілуде. 2025 жылы аудандық ауруханаға 10 жас маман келді. Оның ішінде 1 дәрігер және 9 орта буын медицина қызметкері бар.

Ал 2026 жылдың III тоқсанында ауданға 13 дәрігердің келуі жоспарланған. Олардың қатарында 6 жалпы практика дәрігері, педиатр, оториноларинголог, нефролог, ересектер онкологы, акушер-гинеколог, хирург және фармацевт бар. Сонымен бірге 11 орта буын медицина қызметкері қызметке орналасады деп күтілуде.

Қазіргі таңда Қостанай аудандық ауруханасына 50 487 тұрғын тіркелген. Оның ішінде 36 538-і – ересектер, 11 739-ы – 0–14 жас аралығындағы балалар, 2 210-ы – жасөспірімдер. Еңбекке қабілетті жастағы тұрғындар саны 27 830 адамды құрайды.